Недвижимость Беларуси — Гродненская область — Новости недвижимости — Як выглядае 90-гадовы драўляны дом у Гродна, які мінчанін купіў, каб жыць у ім

Як выглядае 90-гадовы драўляны дом у Гродна, які мінчанін купіў, каб жыць у ім

12.06.2019 3084

Аляксандр Лабанеўскі апошнія 30 гадоў жыве і працуе ў Мінску. У канцы 2018 года ён вырашыў вярнуцца ў родны горад і купіў стары драўляны дом у цэнтры Гродна. Гарадскія ўлады такія дамы зносяць, а ён вырашыў аднавіць 90-гадовую пабудову і плануе ў будучыні там жыць. Гiстрорыю дома распавядае партал Hrodna.life.

Будавалі на вякі

Аляксандр купіў дом на вуліцы Рабочай. Каля дома з аднаго боку — рака Гараднічанка, з другога — жвіровая пясчаная дарога, якая вядзе да Нёмана. Дом — драўляны з каменным падмуркам. Пабудова для сваіх гадоў яшчэ добра захавалася, нягледзячы на тое, што гадамі ёй практычна ніхто не займаўся.

— Дом будаваўся відавочна багатым чалавекам. Трохметровыя столі, дыхтоўныя перакрыцці і сцены. Каменны падмурак па стылі падобны да падмурка замка — такія ж камяні і таўшчыня сцен больш за метр. Вышыня падмурка з боку ракі больш за тры метры, а цокальны паверх з двух пакояў выкананы па старадаўняй тэхналогіі скляпеністых перакрыццяў. З-за гэтага сам дом трохі нагадвае замак — відаць, што людзі будавалі на стагоддзі, — кажа Аляксандр.

: Дом на Рабочай, якому 90 гадоў.

Месца сілы

Мясцовыя жыхары кажуць, што спачатку тут жыў святар, якога рэпрэсіравалі ў канцы 1930-х гг. Потым пабудова пабачыла неаднаразовыя змены ўлады.

Аляксандр адзначае, што на вуліцы Рабочай і па набярэжнай ракі ёсць і тыя хаты, за якія нам павінна быць сорамна. Яны дрэнна прыстасаваныя да жыцця, выглядаюць як адрыны. Але некаторыя з іх можна выратаваць і паказваць турыстам, якія, дарэчы, рэгулярна ходзяць па вуліцы Рабочай цэлымі групамі, разглядаюць ландшафт і дамы, што засталіся ў якасці сведак гісторыі. Аляксандр кажа што зона набярэжнай пад двума старадаўнімі замкамі - гэта месца сілы.

: У старым доме Аляксандр паказвае арыгінальную бэльку, якая яшчэ ў добрым стане.

Свой дом Аляксандр пастараецца пакінуць у тым выглядзе, у якім ён захаваўся. Заменіць толькі элементы, якія прыйшлі ў непрыдатнасць за 90 гадоў і ўпарадкуе тэрыторыю.

: Арыгінальныя аканіцы, якія захаваліся на доме.

Не толькі для сябе, але і для нашчадкаў

Над аднаўленнем дома Аляксандр працуе з жонкай і сябрамі. Імкнуцца рабіць усё сваімі рукамі. Для іх важна, каб пабудова ў будучыні была не толькі іх жыллём, а каб дом прыцягваў увагу гараджан і турыстаў.

-Рэсурсы ў нас невялікія, але мы пастараемся зрабіць як трэба. Што робіць любы гродзенец у выхадныя дні? Ён ідзе ў стары горад з дзецьмі, з сябрамі, тут прызначаюць сустрэчы і спатканні. Сюды людзей цягне, тут свая атмасфера. Я ўпэўнены, што трэба захоўваць усё, што вылучае Гродна ў гістарычным, рэльефным і ландшафтным плане. Важныя разуменне і дапамога з боку дзяржавы. Толькі агульнымі намаганнямі можна захаваць унікальную гістарычнасць нашага горада. Мы робім гэта не толькі для сябе, мы захоўваем гісторыю для нашчадкаў.